Site hosted by Angelfire.com: Build your free website today!

مطفووق والنملة عفاف (2)

مقدمــــة:-
مرت خمس سنوات وانا في شهار قاعدن في زاوية وفارش فيها مرقدي ((أي فراشي)) وموزي دربيلي تحت مخدتيطبعآ كل الفترة ملبد ((أي ساكت)) ومنيب راعي مشاكل وقبلي ((أي دايم)) اهوجس في عفااف واحتسي بيني وبين نفسي !! هي تذكرني ولا نستني؟؟ كانت شفايفي ترتجف مع الهواجيس ((الدكاترة يحسبوني اقراء ورد وقرآن وقالو اكيد الرجال عقل))<<----- امحق عقل والله جنبها..

رؤس الاقلاااع :- <<----- يامصلك بس

1-الجعابة ...((قعرانة بلغة منفوحة))

2-الشبّا...((ثيل ينبت في الماء اذا وطيتة تقرصك اذانك))

3-كنبل...((بطانية))

4-ابو حليمة...((يشبة الجراد بس لونة اخضرواسود))

5- حرمل...((شجر ينبت في البر))

القصـــــــــــة :-

القصة اني اوحيتهم ((أي سمعتهم)) يحتسون انهم بيطلعوني بكرة وطار النوم من عيني واتمدد على السرير واهوجس في بكرة وماش اونست ((أي حسيت)) ان ظهري يوجعني من السرير وانا اللي اذب عمري تحتة وارقد بين السريرين واغفي ((أي نمت)) وتنفتح طرف شفتي وتبداء السعبيل تصب وتمشي ((كنك تشوف ضحية مذبوحة)) وكان خدي لازق في الارض واسمع ذيك اللي تصارخ وافتح عيني اللي نصف بياضها لامسن الارض واشوف في بحيرة سعابيلي شي يتحرك وبعيد وصغير واطلع الدربيل ولقيتها دلّيل ((هذي دلال بنت خالت عفاف كانت تجيبها معها للبرادة وتسولف معنا وتسبر لنا ((أي تراقب لنا الجو)) وانا اللي افصخ ثيابي وخذ سباحة في سعابيلي ((ماتسمع الا تصميخ ذرعاني في البلاط)) قلت منيب رايح رجلية مهوب ممديني خلني الحق عليها سباحة وانا اللي امسكها بطرف ظفري واتدربااا انا واياها جنب النقعة ((نقعة سعابيلي)) وقلت سلامات؟؟؟ قالت هلا مطفووق وهي اللي تخمها بتسوة ((أي صاحت)) واقوم ارفع الشعر عن وجهها وامسح دموعها بعود اذان وقلت بسك <<--- يازينها ودي اعيدهاا قالت مطفووق الحق على عفاف ابوك بيبلط البيت ((أي بيخلية زي الحمامات املس)) <<---- هذي حدود معرفتة بالبلاط قلت وتوك تجين ؟؟ خمس سنين؟؟ قالت وش اسوي جاية رجلية..قلت يانذلة كان استاجرتي صارور وانا احاسبة<<--- اقول كل تبن بس والله واخذها على كفي وارقى على سريري احتريهم يفتحون مكتب الادارة واقعد اخذ علوم عفاف ودلال تشيش فيني وتقول عن الاضطهاد اللي عاشتة في بيتنا عفاف والجوع اللي جاهم عقب ماسافرت عنهم ((طبعآ كنت مزبنهم برز اهلي عشان اصد بالحبيبة ويوم رحت ماتو جوع)) ولا من زود القرادة شرو اهلي مكنسة كهرب ((يعني انسى يلقون حبة رز)) وقالت ان عفاف تدق عليها كل ليلة وتقول مطفووق اكيد صادق قعاسي الطايف ومعد هوب راجع كلهم مثل بعض هو وشافي ((يعني قليلين خاتمة)) وقالت لازم تلحق عليها تراها فاهمة الموضوع غلط ماتدري انك يالضعيف لازلت محتفظ بصورتها ومصكوكن عليك فيذاا يالدبشة ومابقي من ملامح وجهك الا ربع خدك الايسر والباقي مغطية الشعر ((تقول بركة مفرغة ومشبّية اذا تفصخت)) ويوم صاواا ((أي غرد)) اول عصفور وماتشوفني الا كني وكيل مدرسة في فسحة ((ماشي وموجة خنافري للارض ورافع كف يدي وعليها دلّيل كني اقول عطوني ريال)) والعن ام الباب حق غرفة المدير ويضرب ويرجع على خنفرتي واطيح سدّر ((أي غيبوبة)) ثلث ساعة.. وقوموني وقالو سلامات؟؟؟ ((طبعآ قمت واقف ورافع كف يدي)) وقلت ابد ابمشي يالشيخ<<---انواع المونة قال اصبر لين يجي ابوك ونطلعك !! قلت اسف ابمشي الحين الموضوع ضروري قال سلامات وشفيك يدك توجعك؟؟؟ قلت لا معي الاهل ولازم اوديهم !! طارت عيونة وقال وينهم وامد لة الدربيل وقلت دلال تغطي وثول ودربلها وقال اهااا اجل تقول لي الاهل يا مطفووق؟؟؟ قلت اية انجز ((أي اخلص)) علي ابمشي وهو اللي يمشي ويتصل على ابوي وانا اناظرة وقال يالاخو هونااا لعد تجي عطنا خمس سنين ثانية الموضوع كبر!!! قال ابوي افاااا؟؟ لية؟؟ قال ولدك يحاكي نملة !! قال ابوي اشوى نملة الله يبشرك بالخير يعني ماصار يحاتسي جن؟؟؟ اصبر خلني ابشر امة قال ابوي يادختور اتركو الولد تراة طيب اول عمرة مصادقن سلوقي في الحارة ويكشت هو واياة با الاسابيع.. والله ويهجون ((أي فتحو)) لي الباب واشوف النور واطق المريات الشمسية وللرياض رجلية ورافع كفي ودلّيل متوسدة الابهام يقال لك بتقلب لونها ((يعني بالمايوة يابهم)) ووصلت بيتنا ودموعي تغورق ((أي تنزل)) واشوف لون ابيض من تحت الباب ((كنة حليب مكبوب)) كان لون جلي البلاط وارن الجرس واسمع امي من اول السيب تصايح تقول مين؟؟؟ وتوها فاتحتن الكيلون ((يعني طلع صوت طق)) واعطي الباب نفس الرفسة حقت المستشفى بس انحشت قبل لايرجع على وجهي بس الغريب مارجع الباب واناظر !! لقيت سيقان بدون جلد طالعة من تحت الباب؟؟ وادخل واطل ورى الباب والقى وحدة غريبة ماقد شفتها كل جلد سيقانها تجمع في وجهها وصوتها تغير ((كنها واحدن يحتسي تحت كنبل ((أي بطانية)) واجرها واجي واحط ماطات رجلي على ماطات رجلها واسحب الجلد ((كني البس بزر هليهوب )) واجيب الجلد واخيطة بسيم معلاق من عند الماطات والرجل الثانية مثل.. ويوم خلصت والقاء عيونها في رقبتها ((قعدت ارخي في السيم لين ماوزنت فتحت خنافرها في فتحت الخنافر بالجمجمة ))واناظر واثرها امي!!! وانا اللي انطلق حاط دربيلي وازاعق انادي عفاف وهي تمشي وراي يطلع منها صوت كنها لابسة كعب ((صوت الاسيام تحت)) وتقراء علي واتفاجئ بالبيت كلة بلاط ومن فرحت اهلي يتغدون علية يكبون الرز على طول على البلاط ((يلعن ام الفرحة)) والقط الفاروع وخذ تكسر ودموع تنزل ادورها تحت الانقاظ ودرت على السيب كلة احفر وللاسف مالقيت اثر.. واطمر للبرادة ولقيت رسالة بتاريخ قديم ((صار لون الورقة اصفر من الزمن)) عقب ماغبت عنها بشهر وكانت حروف الكلام سايلة مع الدموع على الورقة يالله فككت حروفها وكانت تذكرني بكل لحظة في حياتنا وانها تسمع بطنها يصاوي من الجوع وفي اخر الرسالة نقطة صغيرة حمراء خفت انها نقطة دم انتحرت عقب الرسالة بس يوم شميتها دريت انها بوسة ((صارت روج)) طلعت بدربيلي للشارع اصايح باسم عفاااف والناس يتحمدون الله مشيت لبيت جدتها ((جعابة تسكن في عتبة واحد اقشر جندي اول في امن الطرق والاخلاق دمار)) وجيت وسجدت عند عتبة بابة وقمت اناديها ام عبيد ام عبيد وماسك الدربيل بيديني ((مادريت طلع العري راعي البيت وصار من زين الحظ اسمة عبيد ويحسبني انادي امة وكمل عليها اني ساجد وادربل يحسبني اطل من تحت الباب)) ومادريت الا بعصاء المكنسة يمزع جنبي وارفع عيوني بالدربيل واشوف مخ؟؟((الدربيل جاب مخة مع خنفرتة)) واوخر الدربيل ولا العصاء جاية تمشي مليون على الجهه ويسحبني ويذبني في الحيالة ((كني قطو مصدوم وخشمي يرعف دم)) واقعد في غيبوبة اسبوع بدون اكل وشرب ويبست مرة ((غديت كني صندقة حمام مفكوكة ومذبوبة كني ليحان مجمعة))المهم ويصادف في هالارض بيت نمل ويسّخر الله لي بزرين نمل ورديين ((أي لونهم وردي)) ولابسين طوقي وش ملحهم ودك تجرعهم وحتسيهم فية لتغة وواحدن منهم لة غمازات ((من زود الملح)) ورحموني ودلو كل يوم يسرقون من مستودعهم جراد ويجون لي ويدسونة في اثمي با ابرة خياطة ((وانا لازلت في غيبوبة)) وادلي الهم في هالجراد لين ماربعت ((غديت تسني ضب متروكن في خريم)) وقمت ودربلتهم وتشكرتهم ((المشكلة صارو ياكلوني ابو حليمة يجمعونة من حرملة في البرحة)) وحسيت انهم كل من لي بهالدنيا وصرت ارقد في هالبراحة جنب الجخر وما افارقهم ابد ويجي ذاك اليوم واقوم على ذاك الصوت اللي يطلع من بيت النمل وحدة تقول لؤي ((لؤي هذا ابو غمازات)) تعال وانا امك خذ غداء الرجال ((اللي هو انا)) وتدور بي الدنيا وتنزل دموعي ويقمط قلبي واحس كني نازلن من دحديرة بسرعة ((يعني خفت قلبي)) وامسك لؤي مع كتفة وقلت تعال من هذي؟؟؟ قال هذي مغا مغا <<--- يقالك جبتها الحين بلتغة ((يعني ماما)) وقلت وعيوني تدمع وش اسمها؟؟ قال مغما عفاف!!! وانا اللي انشل في محلي ودموعي قامت تسورب لين ما انحقن ((أي امتلى)) سري وفي نفس الوقت سمعتها تقول يااللولو ((اللولو اخت زوجها)) ابروح للدكان ابشري حلاوة ابشيل شعر ذرعاني وسيقاني ابو لؤي يقول انة بيجي الليلة

وانا اللي اقمز مابيها تشوفني ومابي اضيع مستقبل هالبزران اللي ماخلوني ووقفو جنبي في محنتي ومابي اكون ماضي تعيشة بحاظرها<<-- قسم بالله كلام كبير ياكذا الحب يابلاااا

وهي اللي تطلع واشوفها تلف في الطرحة واقز جبهتها وعيونها في الارض مابعد رفعت السوادة وانا اللي اغطي وجهي بيديني واركض لاتعرفني واطلع بالغلط على الخط وانا مغطي عيوني ويلقطني راعي كدلك مع جنبي ((عرفوة برقم اللوحة طابع في تسلوتي((أي كليتي))...

الصدمــــــة :-

وصل كلام من مصدر مؤثوق ان عفاف قالت لبنت جخر جيرانهم فكني الله من شاافي الاسود... ومن مطفووق الهيس الاربد... ورزقني بهالقعسي اللبناني الامرد ((اي بدون شعر))..

ملاحظــــــة ...

حب ادميــة وأن مالقيت صارح لك طوفرية ((الطوفرية اللي يجاب فيها الشاهي والبيالات للي يحتسون روسي))

ـــــــــــــــــــــــــــــــــــــــ

مطفووقMatfoog

hllle2003@hotmail.com