其實呢度係冇咩好睇,只不過我o係醫院度做o左都有一年時間,唔多唔少都有好多o野o係出面經歷唔到o既,又想出面o既人知道我見到D咩,同學o左D咩,所以想o係呢度同大家分享一o下,若果細膽o既話可以唔睇架!不過我話晒都係o係私家醫院,冇急症室,睇少好多核突野架啦!
- 其實未入行o既我真係好驚血o架,又唔肯捐血,唔肯打針,唔肯食藥,不過依家唔同晒啦!
- 首先我第一日返工,見到個末期癌症o既伯伯,佢D腳止黑晒爛晒,o個陣時我未睇過呢D野,覺得好恐怖!同師姐幫佢轉身訓,我唔敢郁佢,因我驚整痛佢,但最開心o既係佢咁辛苦都對住我笑,令我好感動!到第二日返工,佢剛剛過o左身啦!為佢流o左第一滴淚,但o個時我未學包屍,要等師姐包,我諗如果要我包我真係會好傷心!
- 初初唔習慣逢返早都要幫D病人bed bath(抹身),不論你係男定係女,係老定係幼,總之係人都要抹,尤其係D老人家,一揭開佢地塊尿片,全都係屎,臭死人啦!如果佢地痾血o既話,真係腥到成日唔使食飯!
- 有一次我扶個伯伯去廁所,想扶佢幫佢抹乾淨,點知原來佢PR Bleeding,即係痾血,成地,褲,腳,什至我對鞋都係血,即刻叫姑娘來睇,o個陣真係嚇死我架!
- 唔止呢次,有一次又幫轉個婆婆身訓,佢有好多病,又有痣瘡,我揭開佢塊尿片見到成塊片都係血,佢個痣瘡不斷流血,腥到我頂唔順,但都要當冇事發生咁用棉花幫佢抹乾淨,咁o個陣唯有閉氣啦!不過過o左幾日個婆婆pass o左啦!
- 又試過有個嬸嬸做完手術返o黎話想嘔,我就俾個盆佢嘔,點知佢噴射式咁嘔晒落我個身度,不特止,仲要繼續做o野,直至lunch先可以返宿舍換衫!
- 我最傷心o既係當服侍o左D病人都有一段日子o個陣一話要走就走,我真係好唔開心,見到D家人喊苦喊忽真係好唔安樂,覺得自己做得唔夠好,好似害o左佢咁!一係就好似幫唔到手,唔知點算好!
- 最難忘o既一次係有一位譚姨姨患o左Ca bladder(膀胱癌),佢已經切o左個bladder,colon同ovary,connect o左個屎袋o係左腰,尿袋o係右腰,做o左兩次gutt resection,佢已經係terminal啦,不過佢仍然要堅持落去,我真係好佩服佢,起初我覺得佢好麻煩,後來同佢及佢D屋企人熟o左就好鍾意服侍佢o地,好想滿足佢,日日幫佢抹身,洗口,有時同佢床上洗頭,但佢一日比一日差,唔可以食o野,因個胃冇晒工能,插o左條胃喉每個鐘抽取胃內容物,有個禮拜我返夜,一樣每個鐘幫佢抽,同量小便,每次都係幾十cc左右,有一次佢話想嘔,我就即刻幫佢抽,點知一抽抽o左千幾cc既啡綠色水出o黎,真係嚇都嚇死,之後過多一排,佢已經冇尿出,佢D屋企人都知到佢等唔耐,醫生都冇晒辦法,唯有日日幫佢打嗎啡針止痛過日,有一次我又幫佢抹身,見到佢成個肚都發晒炎,大脾生o左好多水泡,個人不久就開始confuse,語無論次,不久就pass o左喇!佢D仔女係咁喊,而佢老工就躲開一邊,我走過去想安慰佢,見到佢係度喊,但又唔想人知,好辛苦咁!所以我最終冇行埋去,唯有繼續做o野啦! Totally都係一個月左右....都唔明點解佢咁好人,又冇不良嗜好,每年都有去驗身,但一驗就驗到佢Ca terminal,真係冇天理!
- 有位先生有病成日訓係張床度,D手腳硬晒,兩個pat都爛晒,好似食o左o既西瓜咁好核突,經過D姑娘日日同佢洗傷口,個傷口已經細o左好多,但要成日(大約每兩個鐘)要更換插住o既尿壺,如果唔係又要換過晒D床單同衫褲,有個禮拜我又要看夜,初初唔識整到濕晒好慘!原本佢唔識應人,只係唔鍾意你就會噴口水,後來我成日整蠱佢,成日聊佢玩,終於佢識得講我個名出o黎,我真係好開心呀!冇幾耐佢仲可以出院過新年添!
- 有一次我師姐看夜見到有個病人成床都係血,原來佢係自殺,佢用生果刀去割自己條頸,同埋割斷晒自己D喉管,即刻call醫生入手術室搶救,輸o左十幾包血,救o左成晚再入ICU,好彩救得返,不過我個人認為浪費o左D捐血o既人o既心意,更累我師姐要落口供冇得訓!
- 患肝癌o既人真係多不勝數,個個都係全身黃晒,連眼白都係黃色,睇解剖書見到o個D肝真係好恐怖,好似燒熟o左咁!
- 終於都有第一次啦!我講緊係第一次包屍,話說有個好氣速o既婆婆,日日都係個泰妹照顧佢o既,某日個泰妹放假,由個賓賓帶飯俾婆婆食,點知婆婆氣速濁到,但個賓賓一直都唔知,當我師姐走去幫佢探熱o個陣見到佢唔對路,成個人紫晒,即刻叫姑娘,再call醫生,佢地同婆婆suction,breathing o左好耐,都有個幾鐘頭,最終都救唔返,D家人緊係傷心啦,仲諗住出院添!!而我緊係同師姐一齊包啦,初頭都幾驚架,佢又肥喎,好重嘛!我至驚係唔小心講o左師姐個名出o黎,不過我都好專重佢,每同佢做野都會單聲俾佢聽!!!
- 有個禮拜我去o左育嬰室做,幫D BB沖涼同餵奶,好鬼死悶,搵o左本本院出世o既怪胎相集睇,好鬼恐怖,有D一出世D皮膚好似燒傷晒咁,成條香腸咁,一D就好似ET,有D得一隻眼,冇鼻哥,爛咀,個肚有個大瘤咁,仲核突過龍珠Z o既怪物,真係難為D亞媽,心痛死啦!
- 我成日同D姑娘講有亞媽生仔o個陣一定要俾我入去睇,好彩到最後一日終於有得睇,佢老公都睇埋一份,可能個醫生專業,個亞媽都唔係好痛,好快就見到個BB出o黎,抽埋臍帶血,醫生好好人咁解釋俾我聽,記住要生仔都要搵個女醫生!
- 又有一個禮拜我o係門診同特診度做,有好多人o黎洗傷口,洗到我手都軟,記得有個亞媽煲燙o個陣唔小心燒著o左件衫,o黎到成條腰都係水泡,又有個女仔俾滾粥燙到隻手,有個男仔係班度坐低o個陣俾較剪插親個pat要醫生連針,有位女士個傷口成塊膠擦咁深...........總之好多好多!
仲有好多好多難忘o既經歷,等我記得先再同你o地講啦!總之我好鍾意做呢份工啦!(如果唔使讀書o既話)