陳奕迅 Eason Chan　唔做得唔得？ Can I Give Up?

Site hosted by Angelfire.com: Build your free website today!

　
唔做得唔得？

　　以下是一個對 25 歲男性的精神肉體測試。
　　究竟一個人 30 小時不眠不休，神智會否清醒？
　　陳奕迅做了這個實驗。
　　下午出席記招，黃昏拍戲，翌日早上收工，跟住回家換衣服，再去《勁歌》綵排，再去做訪問，跟住下午四時約霆鋒食午飯，五時三十分入電視城做《勁歌金曲》錄影，再做訪問，挑戰人類的終極紀錄。
　　結論是他神智仍清醒，說話好有火氣，只是對外賣的味覺開始冇反應。
　　「菠蘿油好唔好食？」我問。
　　「唔知。」他答。
　　「公仔麵得唔得？」
　　「唔知。」
　　知得最清楚的是他枱又瞓得，櫈又瞓得，橫瞓又得，掂瞓又得！得咗！
　　第二日，陳奕迅病咗！

差點做了建築師
　　參加《新秀》前，我以為自己會係一個建築師，我讀建築系，係因為嗰時我唔知讀乜好，老豆提議我讀建築系，無迫過我，但我又心大心細諗住讀心理學，老豆又話讀心理學無用，賺唔到錢，橫掂我讀開數學、物理學、同埋美術呢三樣嘢，讀建築就可以學以致用，加上爹哋又係做建築呢行，我就順理成章讀建築系。
　　我對建築興趣都未培養到，就返香港參加「新秀」，我都係諗住試吓啦！隨緣囉！點知就掂咗，改變我嘅一生。如果唔係「新秀」，我諗我依家仲讀緊書。
我想擁有間製作公司
　　頭兩年做歌星真係唔知做乜，毫無目標，想努力都無從入手。其實想喺樂壇要做到點點點 ...... 基本上就唔到我自己控制。我就畀咗三年時間自己，如果努力過，都無運行，就只好返去繼續讀書。今日，我有少少成績，加強咗我嘅事業心，我依家更加上晒心，我好想擁有一間自己嘅錄音室或者製作公司。依家起碼會有自己嘅理想，以前我真係無理想，無話入行一定要賺大錢，或者要喺樂壇做到甚麼位置。
數盡樂壇不公平事
　　除了唱歌，我對自己作曲都好有信心！以後會更加畀心機去作，我作歌唔多，不過，我作多啲自然會畀人認識多啲。
　　娛樂圈太多唔同嘅思想，有啲人無意中傷害咗某啲人，用文字又好，說話又好，但唔一定係傳媒，有時歌手、唱片公司及觀眾之間都可能會有，呢個圈有好多諗法我係唔認同，譬如成日都話四大天王 Out 呀！依家我同霆峰 In 呀，我覺得， In 唔 In 、 Out 唔 Out ，係你哋定之嘛，無標準㗎。
　　封號、 In 同 Out 係潮流嘢，但係嗰四個人畀人叫做四大天王，其實呢四個人都係獨立個體，獨立嘅歌手，只不過之前所有焦點擺晒落呢個四個人上面，其他聽眾、媒體都忽略咗其他人，其實仲有好多有實力嘅人，只不過只會成為第五天王呀、天王殺手呀、或者天王乜乜 ...... 你哋唔應該只集中睇晒嗰四個人，仲有好多人識唱歌，好多人對音樂有熱誠，好多人都得㗎！
許志安早就應該得大獎
　　大家有目共睹許志安今年攞「最受歡迎男歌手」獎，老實講早幾年佢已經有資格，我感覺上幾年前安仔啲歌已經好「掂」，值得有獎，但嗰時佢竟然連銅獎都無。
　　我好唔明點解新人唔攞得「最受歡迎歌手」獎。如果講今年最受歡迎女歌手，點解來來去去都係梁詠琪、陳慧琳、王菲、鄭秀文，而唔係張柏芝、容祖兒，佢哋都好受歡迎，點解忽略，點解淨係可以攞新人獎，點解咁唔公平，我覺得佢哋有資格競逐。又譬如我啲歌假如真係好勁，點解我無份去角逐「最受歡迎男歌手」獎，又係四大天王呀！我覺得大家聽歌太窄，淨係識得聽嗰幾個 hit 嘅，有無真係了解樂壇真正走勢。
感情？點解要同你交代
　　我好似好多嘮囌咁，我只係想講我眼見到嘅感覺，不過，呢個圈有時真係要食得鹹魚抵得渴，有啲工作我覺得幾唔願意做都要做，呢一個係遊戲規則，如果我紅，我可以揀我想做嘅嚟做。如果你問我呢一刻想唔想做《勁歌》，我會答你：唔係好想。呢一刻我最想做咩？我最想瞓覺。至於宣傳呀，訪問呀， Game Show 呀，我覺得好，無狀態去做得好，只不過 ...... 呢個係責任。
　　雖然工作得好辛苦，但我無諗過喺呢行做到幾多歲，譚詠麟咁嘅年紀仲做緊，所以做到幾多歲係態度同埋心境問題，可能我到咗某個年紀，我好鍾意愛情，但我依家就好嚮往追求事業，事業心仲好重，事業畀到我好大滿足感；拍拖？真係無乜時間！拖可以遲啲再拍。
　　我同阿「邊個」感情事無特別刻意公開過，人哋問我，我盡量唔答，因為我無需要答，呢啲係我私人嘢，我覺得我工作上已經付出，點解唔可以工作還工作，感情還感情，感情係兩個人嘅私隱，我餵好朋友食，我同佢一齊幫隻狗梳毛，一人梳一下，咁駛唔駛講畀人聽，呢啲嘢駛乜同人交代，每一秒報告晒畀人知呀，唔通去幾多次廁所都要講咩。留番多啲空間畀拍拖嘅藝人，唔係淨係我哋兩個。
公仔麵
　　關於食物，陳奕迅沒有特別要求，只要可以放入口，不太難食的便可以。
　　不過對漢堡包及公仔麵卻特別有感情。
　　因為在美國讀書時，他曾在麥當勞賣過漢堡包，也賣過公仔麵。
　　冇錯！係公仔麵。
　　在唐人街買或者叫朋友從香港帶過去，跟住以兩倍價錢賣畀鬼佬。
　　「鬼佬未食過，一食覺得好正，貴都肯買，幾開心！」他說。
　　哦！呃鬼佬！
Source：《忽然1周》No.235　Date：29 January 2000
Text ：林碧洋　Photography：徐志權